Sonsoles de Tenorio » Partituras

Preparámonos para o Corpus de Pontevedra

Sonsoles — Fri, 11 Apr 2008 08:39:29 +0000

Prezados alumnos,

Deixo neste blogue do que pasades bastante unha serie de partituras de pezas relacionadas coa festividade do Corpus de Pontevedra, pois é moi posible que vaiamos tocar na procesión coma o ano pasado. Este ano gustaría que nos prepararamos mellor así que imos comezar xa.

Como vedes hai dúas pezas:

Marcha de Xigantes: é unha especie de pasodobre bastante animado, moi sinxelo. Imos comezar por esta.
Chucurruchú: olvidade a marcha que tocamos o ano pasado, esta parécese moito pero é moito máis guay pois é unha versión para gaita feita por Fermín a partir dunha obra para 2 violíns e violonchelo dun músico que se chamaba Igrexas Vilarelle e foi un persoeiro destacado na Pontevedra da primeira metade do século XX.

Propoño que busquedes información sobre esta festividade que tanta sona ten en Pontevedra, información como:

Que se celebra
Dende cando se celebra en Pontevedra
En que consiste a celebración do Corpus en Pontevedra

Agardo as vosas aportacións, non me falledes

Sonsoles

Marcha de Xigantes de Corpus Para Acodeón

Marcha de Xigantes de Corpus Para Gaita

Marcha de Xigantes de Corpus Arquivo Midi Para Practicar

Chucurruchú Para Acordeón

Chucurruchú Para Gaita

Chucurruchú Midi Para Practicar

Marcha Procesional de San Bieito

Sonsoles — Thu, 01 Nov 2007 12:14:06 +0000

Como prometera, vai a partitura a dúas voces da “Marcha Procesional de San Bieito“.

O venres tocarémola a dúas voces e darémola por sabida, os que aínda non a teñades segura practicade moito estes días que hai que seguir avanzando.

Ánimo!
Marcha procesional de San Benito

Alumnos avanzados: Carballesa

Sonsoles — Mon, 29 Oct 2007 12:42:36 +0000

Para os alumnos que non comezades este ano deixo á vosa disposición a partitura orixinal da “Carballesa“, a transcrición de don Casto, non a adaptación que fixen eu para os que comezaban este ano.

Carballesa_avanzados

Como veredes, é practicamente igual pero hai dous detalliños que cambian. Gustaríame que analizarades a partitura con detemento, que detectedes os cambios e os toquedes, tal cual está no orixinal. Unha vez feito isto estaría ben incorporarlle algúns adornos que, aínda que non están na partitura, os gaiteiros adoitamos introducir, como ben sabedes. Podedes poñelos onde queirades e o venres escoitaremos todas as versións na aula. Para non liarvos empregade só picados e mordentes.

Áimo, que a inspiración os colla tocando!

Alumnos de Iniciación: Carballesa

Sonsoles — Thu, 18 Oct 2007 19:53:48 +0000

Comezamos o curso traballando aspectos rítmicos e métricos. Principiamos polos ritmos binarios e o compás de 2/4, no que é moi frecuente atopar escritos algúns tipos de ritmos da música tradicional galega.

Velaquí tedes a partitura en PDF dunha das pezas recollidas no Cancioneiro de Casto Sampedro y Folgar: Carballesa_Iniciación. Neste caso trátase dunha adaptación para os alumnos que dan os seus primeiros pasos na dixitación pechada. As carballesas son bailes similares ás muiñeiras pero máis ledas e animadas (se é posible!) en canto ao ritmo, poden estar escritas en 2/4 ou en 6/8 (a maioría das muiñeiras adóitanse escribir neste último). Parece ser que o seu nome ven dado pola zona donde a maior parte delas foron recollidas, as terras de Carballiño, provincia de Ourense.

O Cancioneiro elaborado por Casto Sampedro y Folgar é unha fonte fundamental para coñecer a música tradicional galega. Invítovos a que, a través de internet ou outras fontes, afondedes na figura deste senlleiro personaxe, e me escribades os resultados das vosas procuras en comentarios a este artigo.

Por outra banda todos sabemos onde está O Carballiño, non si? Tamén podedes escribir cousas sobre esta vila e a súa comarca nos comentarios.